ალდის ჰოჯმა, შესაძლოა, ჰოუკმენის ფრთები სამკერდე ნიშანზე გაცვალა, თუმცა მსახიობმა განაცხადა, რომ მისი პერსონაჟი „კროსში“ სუპერგმირს ბევრად უფრო ჰგავს, ვიდრე ბევრს ეგონება. ჰოჯი Prime Video-ს სერიალში მთავარ პერსონაჟს, ალექს კროსს ასრულებს. ScreenRant-ის ჟურნალისტთან, ეშ კროსანთან ინტერვიუში მსახიობი განმარტავს, თუ როგორ არის მკვლელობის გამომძიებელი და სასამართლო ფსიქოლოგი საკუთარი გზით სუპერგმირი. მიუხედავად იმისა, რომ ჰოუკმენი სუპერბოროტმოქმედებს DC სამყაროში ებრძვის, ხოლო კროსი უფრო რეალისტურ გარემოში, ვაშინგტონში მოქმედებს, ჰოჯს მიაჩნია, რომ ორივე პროტაგონისტი ერთი და იმავე მიზნისკენ ისწრაფვის. ისინი ებრძვიან ბოროტმოქმედებსა და იმ ადამიანებს, რომლებიც მათ დათრგუნვას ცდილობენ. ჰოჯმა ასევე აღნიშნა, რომ გაზრდისას კომიქსების დიდი მოყვარული იყო. მისი თქმით, კომიქსები და სუპერგმირები რეპრესიების წინააღმდეგ ბრძოლის სიმბოლოა. ისინი ებრძვიან მსოფლიოში არსებულ უამრავ უსამართლობას და ცდილობენ, დაიცვან სხვების უფლებები, რაც ზუსტად ისაა, რასაც კროსი ყოველდღიურად აკეთებს. „გრაფიკულ რომანებსა და კომიქსებზე გავიზარდე. მიყვარს ანიმე. ანიმეზე ვარ დამოკიდებული. სუპერგმირები და კომიქსები გამოიგონეს, როგორც სიმბოლიკა რეპრესიებთან გამკლავებისთვის ისეთი გზებით, რომლითაც პირდაპირ ვერ შეებრძოლებოდი. შენ საკუთარ თავს სუპერს ხდი. შენ ქმნი იდეოლოგიას იმის წინააღმდეგ, რაც გთრგუნავს. ვფიქრობ, ალექს კროსი ამას განასახიერებს. ყველა პერსონაჟთან მუშაობას მათი გულწრფელობიდან ვიწყებ. რა სურთ მათ? ვინ არიან ისინი? სად არიან? რას გადიან? რა არის მათი სურვილები? მათი შიშები? მათი სისუსტეები? მათი ძლიერი მხარეები? ეს არასოდეს იცვლება. ყოველი პერსონაჟის მოგზაურობა განსხვავებულია, მაგრამ მათი განსახიერებისთვის ეს გულწრფელობა უნდა მესმოდეს“, – განაცხადა მსახიობმა. „კროსი“ არის კრიმინალური თრილერი, რომელიც ჯეიმს პატერსონის წიგნების სერიით, „ალექს კროსით“ არის შთაგონებული. სერიალი მიჰყვება პერსონაჟს, რომელიც სერიულ მკვლელებს ეძებს, თავისი მომზადების გამოყენებით, რათა შეაღწიოს იმ კრიმინალების გონებაში, რომლებსაც ის მისდევს. ის ასევე ყურადღებას ამახვილებს მის პირად ცხოვრებაზე და ბრძოლაზე, რათა დაიცვას ოჯახი იმ საფრთხეებისგან, რაც მის კარიერასა და წარსულს ახლავს თან. Prime Video-ს სერიალში ჰოჯთან ერთად ვარსკვლავური შემადგენლობა მონაწილეობს. მსახიობთა შემადგენლობაში არიან: აიზეა მუსტაფა (დეტექტივი ჯონ სემპსონი), ხუანიტა ჯენინგსი (რეჯინა კროსი), ალონა ტალი (კაილა კრეიგი), სამანტა უოკსი (ელ მონტეირო), კალებ ელაიჯა (დეიმონ კროსი), მელოდი ჰერდი (ჯანელ კროსი), ჯენიფერ უიგმორი (უფროსი ეიპრილ ანდერსონი), რაიან ეგოლდი (ედ რემსი), ელოიზ მამფორდი (შენონ უიტმერი), ჟანინ მეისონი (რებეკა), უეს ჩეტემი (დონი), ჯონი რეი გილი (ბობი ტრეი) და მეთიუ ლილარდი (ლენს დიურანი). „კროსის“ მე-2 სეზონის ახალი ეპიზოდები ყოველ ოთხშაბათს გამოვა Prime Video-ზე.