სერიალ „უცნაური ამბების“ ბროდვეის სპექტაკლი, სახელწოდებით „უცნაური ამბები: პირველი ჩრდილი“, Netflix-ზე გამოჩნდება. „უცნაური ამბები: პირველი ჩრდილი“ არის სპექტაკლი, რომლის ავტორია ქეით ტრეფრი. მან ორიგინალური სიუჟეტი დაფერ ძმებთან და ჯეკ თორნთან ერთად შექმნა. სპექტაკლის პრემიერა ლონდონის უესტ-ენდში 2023 წელს შედგა, ბროდვეიზე კი მისი ჩვენება 2025 წელს დაიწყო. „პირველი ჩრდილი“ ორიგინალური Netflix-ის სერიალ „უცნაური ამბების“ პრიქველს წარმოადგენს, ის ჰენრი კრილის ისტორიას იკვლევს, სანამ ის ბოროტმოქმედ ვეკნად გადაიქცეოდა. The Hollywood Reporter-ის ცნობით, ცნობილი გახდა, რომ „უცნაური ამბები: პირველი ჩრდილის“ ბროდვეის დადგმას ამ კვირაში იღებენ. მიზანია, რომ ჩანაწერი მომავალში Netflix-ზე გახდეს ხელმისაწვდომი, თუმცა გამოსვლის თარიღი ჯერ არ გამოცხადებულა. „მიზანი იყო, დაფიქსირებულიყო ბროდვეის ორიგინალური სამსახიობო შემადგენლობა, სანამ ისინი პროდუქციას 29 მარტს დატოვებენ“, — ნათქვამია სტატიაში. „სპექტაკლების ჩვენება გაუქმდა 10-დან 14 თებერვლამდე, რათა გადაღებები მომხდარიყო. საჯარო ჩვენებები 15 თებერვალს განახლდება.“ სპექტაკლის აღწერაში ვკითხულობთ: „ურჩხულები იბადებიან… თუ იქმნებიან? 1959 წელს, ჰოუკინსში, ინდიანაში, კრილების ოჯახი ახალ დასაწყისს ეძებს — განსაკუთრებით მათი თინეიჯერი ვაჟი ჰენრი, რომელსაც სურს, გაექცეს თავის მძიმე წარსულს. ყველაფერი იცვლება, როცა ის პეტის, თანამოაზრე აუტსაიდერს ხვდება, და მათი განვითარებადი რომანი ჰენრის პირველად აძლევს იმედს. მაგრამ როდესაც ქალაქს შოკისმომგვრელი დანაშაულებების ტალღა დაატყდება თავს, ჰენრი იძულებულია, საზარელ სიმართლეს შეხვდეს: არის თუ არა მასში რაღაც, რაც აკავშირებს მას მის გარშემო განვითარებულ საშინელებებთან? ეს ჩამთრევი, დამოუკიდებელი თავგადასავალი ღრმად ჩაგითრევთ „უცნაური ამბების“ სამყაროში — სადაც ყოველ ნაბიჯზე დაძაბულობა და სანახაობა გელოდებათ.“ ბროდვეის დადგმის მსახიობთა შემადგენლობაში შედიან: ბერკ სუონსონი — ჯეიმს ჰოპერი უმცროსის როლში, ელისონ ჯეი — ჯოის მალდონადოს როლში, ხუან კარლოსი — ბობ ნიუბის როლში, ლუი მაკარტნი — ჰენრი კრილის როლში და სხვები. თავდაპირველად ინფორმაცია ბრენდონ შრერმა SuperHeroHype-ზე გამოაქვეყნა.