პოპულარული თამაშის „God of War“ ლაივ-ექშენ სერიალის გადაღებები უკვე დაიწყო. Sony Pictures Television-მა და Amazon MGM Studios-მა სერიალის პირველი ოფიციალური კადრი გამოაქვეყნეს, რომელიც მომავალი შოუს მცირე წინასწარ ხედვას გვთავაზობს. ამ ორ სტუდიასთან ერთად პროექტზე მუშაობენ PlayStation Productions და Tall Ship Productions. Amazon-ის განცხადებით, ადაპტაციამ უკვე მიიღო შეკვეთა ორი სეზონისთვის. გამოქვეყნებულ პირველ ოფიციალურ კადრში რაიან ჰერსტი კრატოსის და კალუმ ვინსონი ატრეუსის როლში არიან წარმოდგენილი, რა დროსაც კრატოსი ატრეუსს ასწავლის, თუ როგორ ისროლოს ისარი სამიზნეში. სერიალი „God of War“ მიჰყვება მამა-შვილს, კრატოსსა და ატრეუსს, რომლებიც „ცოლისა და დედის, ფეის ფერფლის გასაფანტად მოგზაურობაში მიემგზავრებიან. თავგადასავლების განმავლობაში, კრატოსი ცდილობს თავის შვილს ასწავლოს, თუ როგორ იყოს უკეთესი ღმერთი, ხოლო ატრეუსი ცდილობს მამას ასწავლოს, თუ როგორ იყოს უკეთესი ადამიანი.“ ჰერსტისა და ვინსონის გარდა, Playstation-ის ადაპტაციაში მონაწილეობენ მსახიობები: მენდი პატინკინი (ოდინი), ედ სკრეინი (ბალდური), მაქს პარკერი (ჰეიმდალი), ოლაფურ დარი ოლაფსონი (თორი), ტერეზა პალმერი (სიფი), ალასტერ დანკანი (მიმირი), ჯეფ გულკა (სინდრი) და დენი ვუდბერნი (ბროკი). რონალდ დ. მური („Battlestar Galactica“, „Outlander“) სერიალის შოურანერის, აღმასრულებელი პროდიუსერისა და სცენარისტის როლს შეითავსებს. დამატებითი აღმასრულებელი პროდიუსერები არიან: მერილ დევისი, კორი ბარლოგი, ნარენ შანკარი, მეთიუ გრემი, ასად ქიზილბაშ, ჯეფ კეჩემი, ჰერმენ ჰულსტი, როი ლი და ბრედ ვან არაგონი. ჯო მენოსკი, მარკ ბერნარდინი, ტანია ლოტია და ბენ მაკგინისი სერიალის თანა-აღმასრულებელი პროდიუსერები არიან. ემის ჯილდოს მფლობელმა რეჟისორმა ფრედერიკ ე.ო. ტოიმ („Shōgun“, „The Boys“, „Fallout“) ასევე ხელი მოაწერა კონტრაქტს სერიალის პირველი ორი ეპიზოდის რეჟისორობაზე. სერიალი რეალურად სამ წელზე მეტი ხნის წინ იყო დაანონსებული. იმ დროს განვითარების გუნდს შოურანერი რეიფ ჯადკინსი და „The Expanse“-ის შემქმნელები მარკ ფერგიუსი და ჰოუკ ოსტბი ხელმძღვანელობდნენ. თუმცა, ისინი ერთი წლის წინ დატოვეს პროექტი და ჩანაცვლდნენ რონალდ დ. მურით, რომელიც ყველაზე ცნობილია „Star Trek“-ის ფრენჩაიზსა და „Battlestar Galactica“-ის გადაკეთებაზე მუშაობით.