„იურული პარკიდან“ რეალურ დინოზავრებამდე: სტივენ სპილბერგის ახალი დოკუმენტური სერიალი

სტივენ სპილბერგმა სამუდამოდ შეცვალა ადამიანების წარმოდგენა დინოზავრებზე, როდესაც გადაიღო ფილმი „იურული პარკი“. (ამაში სამი ათწლეულის გაგრძელებებმაც შეუწყო ხელი.) ახლა სპილბერგმა გამოუშვა თავისი პირველი სატელევიზიო სერიალი დინოზავრების შესახებ – არა ჯონ ჰემონდის მიერ უძველესი კოღოს სისხლით შექმნილ გამოგონილ არსებებზე, არამედ რეალურებზე, რომლებიც დედამიწას მილიონობით წლის წინ მართავდნენ. ვინაიდან ცოცხალი დინოზავრები გადასაღებად არ არსებობენ, სპილბერგის მიერ შექმნილი შოუ ასევე იყენებს Industrial Light and Magic-ის ვიზუალურ ეფექტებს – იმ კომპანიებიდან ერთ-ერთის, რომელმაც უმნიშვნელოვანესი როლი ითამაშა „იურული პარკის“ CGI დინოზავრების შექმნაში. შოუ, სახელწოდებით „დინოზავრები“ (The Dinosaurs), შექმნილია Amblin-ის „სიცოცხლე ჩვენს პლანეტაზე“ (Life on Our Planet) გუნდის მიერ და მას მორგან ფრიმენი ახმოვანებს. გთავაზობთ სერიალის ტრეილერს; თუ ყურადღებით დააკვირდებით, შესაძლოა, იქ „იურული პარკის“ (და „დაკარგული სამყაროს“!) რამდენიმე მინიშნებაც აღმოაჩინოთ. გასაოცარია იმის გაფიქრება, თუ როგორ არ არსებობდა კომპიუტერული გრაფიკით შექმნილი დინოზავრი 30 წელზე ოდნავ მეტი ხნის წინ. ახლა კი ადამიანებს შეუძლიათ მთელი ოთხნაწილიანი დოკუმენტური ფილმების შექმნა ამ ტექნოლოგიის გამოყენებით, რომელიც იმდენად დამაჯერებლად გამოიყურება, რომ თითქმის ნამდვილ ბუნებრივ კადრებად შეიძლება ჩაითვალოს. სერიალს ასევე აქვს ახალი პოსტერი. წარმოგიდგენთ სერიალის ოფიციალურ სინოფსისს: კეთილი იყოს თქვენი მობრძანება „დინოზავრებში“ – ეპიკურ მოგზაურობაში დაკარგულ სამყაროში. აღმასრულებელი პროდიუსერის, სტივენ სპილბერგის, Amblin Documentaries-ის და Life on Our Planet-ის უკან მდგარი ჯილდოს მფლობელი გუნდის მიერ შექმნილი ეს ინოვაციური დოკუმენტური სერიალი მილიონობით წლის განმავლობაში დინოზავრების აღზევებასა და დაცემას ასახავს. მთხრობელია ოსკარის მფლობელი მორგან ფრიმენი. „დინოზავრების“ პრემიერა Netflix-ზე 6 მარტს შედგება. შოუ შედგება ოთხი 60-წუთიანი ეპიზოდისგან.