„ქარიშხლიანი უღელტეხილი“ ბოქს-ოფისს იპყრობს: ემერალდ ფენელის ახალი რეკორდი

მაყურებელი „ქარიშხლიან უღელტეხილზე“ გიჟდება. ემილი ბრონტეს საკულტო რომანის ახალი ადაპტაციის რეჟისორი ემერალდ ფენელია (ცნობილი ფილმებით „სოლტბერნი“, „პერსპექტიული ახალგაზრდა ქალი“), მთავარ როლებს კი კეტრინ ერნშოუსა და ჰითკლიფის სახით მარგო რობი და ჯეიკობ ელორდი ასრულებენ. 2026 წლის „ქარიშხლიანი უღელტეხილი“, რომელიც ვალენტინობის დღის უქმეებზე სალაროებში დიდ წარმატებას აღწევს, კრიტიკოსებმა არაერთგვაროვნად შეაფასეს – Rotten Tomatoes-ზე, ამჟამინდელი მონაცემებით, მან 63%-იანი, „ოდნავ დადებითი“ შეფასება მიიღო. Deadline-ის ცნობით, შაბათ დილის მდგომარეობით, „ქარიშხლიანი უღელტეხილის“ ოთხდღიანი შემოსავალი საშინაო ბოქს-ოფისში სადებიუტო უქმეების ბოლოსთვის 40 მილიონ დოლარამდეა პროგნოზირებული, რითაც ის პირველ ადგილზე გავიდა. მის წარმატებას ორი დღესასწაული უწყობს ხელს: ვალენტინობის დღეს წყვილები კინოთეატრებში შაბათს მიდიოდნენ, ორშაბათი კი შეერთებულ შტატებში პრეზიდენტების დღეა. რეგულარული სამდღიანი უქმეების განმავლობაში, „ქარიშხლიან უღელტეხილს“ წელს ყველაზე დიდი საშინაო დებიუტი ექნება 35 მილიონი დოლარით. მიუხედავად იმისა, რომ მისი საშინაო და საერთაშორისო პროგნოზები მერყეობს, „ქარიშხლიანი უღელტეხილის“ საერთო გლობალური დებიუტი 80 მილიონ დოლარი იქნება. ამით ის მყისიერად გახდება 2026 წლის ნომერ 1 გამოშვება მსოფლიოში, გადაუსწრებს რა რუსული საოჯახო ფილმის „ჩებურაშკა 2“-ის მიერ გამომუშავებულ 79.5 მილიონ დოლარს. „ქარიშხლიანი უღელტეხილის“ გამოსვლამ კიდევ ერთი რეკორდი დაამყარა, რადგან უქმეების ბოლოსთვის ეს ახალი ფილმი უკვე გახდება ემერალდ ფენელის ყველაზე მაღალშემოსავლიანი სარეჟისორო ნამუშევარი. მისი მოსალოდნელი საშინაო შემოსავალი თავისთავად აღემატება 2020 წლის „პერსპექტიული ახალგაზრდა ქალის“ და 2023 წლის „სოლტბერნის“ მსოფლიო სალარო შემოსავალს, რომლებიც შესაბამისად 18.8 მილიონი და 21 მილიონი დოლარი იყო. თუმცა, ფილმს ჯერ კიდევ აქვს წინსვლის პოტენციალი. ემერალდ ფენელის „ქარიშხლიანი უღელტეხილის“ ბიუჯეტი, გავრცელებული ინფორმაციით, 80 მილიონი დოლარია, რამაც მისი სავარაუდო ზღვარი (break-even point) 200 მილიონ დოლარამდე შეიძლება აწიოს. მიუხედავად ძლიერი სტარტისა, მან უნდა შეინარჩუნოს იმპულსი, თუკი ამ მაჩვენებელს მსოფლიო მასშტაბით მიღწევა სურს. საბოლოო ჯამში, დიდია შანსი, რომ „ქარიშხლიანმა უღელტეხილმა“ ასეთ სიმაღლეებს მიაღწიოს, იმის გათვალისწინებით, რომ მაყურებელმა მასზე ბევრად ძლიერი რეაგირება მოახდინა, ვიდრე კრიტიკოსებმა, მიანიჭა რა 84% Rotten Tomatoes Popcornmeter-ზე და B CinemaScore, რითაც ის უქმეების მეორე საუკეთესო ფილმი გახდა, ახალი ანიმაციური საკალათბურთო ფილმის „GOAT“-ის A შეფასების შემდეგ.