ლი კრონინის „მუმია“ წარდგენილია: ახალი შემზარავი ხედვა და პირველი კლიპი

2024 წლის ივნისში ცნობილი გახდა, რომ „ბოროტი მკვდრების აღზევების“ რეჟისორი ლი კრონინი კონტრაქტს მოაწერდა ხელი, რათა Atomic Monster-ის, Blumhouse Productions-ისა და New Line Cinema-სთვის ახალი ჟანრული პროექტი დაეწერა და გადაეღო. იმავე წლის დეკემბერში კი გაირკვა, თუ რა იყო ეს იდუმალი პროექტი: კრონინი „მუმიას“ კონცეფციის ახალ ხედვას გვთავაზობს! რეჟისორმა დაადასტურა: „ეს არ იქნება ისეთი „მუმიას“ ფილმი, როგორიც აქამდე გინახავთ. ღრმად ჩავდივარ მიწაში, რათა ზედაპირზე ამოვიტანო რაღაც ძალიან ძველი და ძალიან შემზარავი.“ ფილმი კინოთეატრებში 2026 წლის 17 აპრილს გამოვა. მიმდინარე კვირას IGN-მა ფილმის პირველი კლიპი წარადგინა. მისი ნახვა სტატიის ბოლოს შეგიძლიათ. ლი კრონინის „მუმიაში“ მონაწილეობენ ჯეკ რეინორი („ზაფხულის მზედგომა“), ლაია კოსტა („ვიქტორია“), მეი ქალამავი („მთვარის რაინდი“), ვერონიკა ფალკონი („სამხრეთის დედოფალი“), ჰაიათ ქამილე („ვიკინგები: ვალჰალა“) და მეი ელგეთი („დაპირისპირება“). უნდა აღინიშნოს, რომ რადგან პროექტი New Line Cinema-ს ეკუთვნის, ეს „ახალი ხედვა საშინელებათა ტროპზე, რომელიც უძველეს მუმიფიცირებულ უკვდავებს ეხება“, არაფერ შუაშია Universal-ის კლასიკურ ჰორორ ფრენჩაიზთან. 2024 წლის მაისში გავიგეთ, რომ Universal-ში „მუმიას“ სამი პროექტი მუშავდება, მათ შორის პრიკველი, რომელზეც სცენარისტი უეს ტუკი მუშაობს, და ბრენდან ფრეიზერის ფილმების გაგრძელება (ესენია: „მუმია“ 1999, „მუმია ბრუნდება“ და „მუმია: დრაკონის იმპერატორის სამარხი“). ცოტა ხნის წინ დადასტურდა, რომ ფრეიზერი და რეიჩელ ვაისი ბრუნდებიან „მუმია 4-ისთვის“, რომლის რეჟისურაზეც Radio Silence იმუშავებს დევიდ ქოჯესჰალის სცენარის მიხედვით. ფილმის სიუჟეტი შემდეგნაირად ჟღერს: ჟურნალისტის ახალგაზრდა ქალიშვილი უკვალოდ ქრება უდაბნოში. რვა წლის შემდეგ, განადგურებული ოჯახი შოკირებულია, როდესაც ის უბრუნდებათ, თუმცა ის, რაც სიხარულით სავსე გაერთიანება უნდა იყოს, ცოცხალ კოშმარად იქცევა. ლი კრონინის ფილმს თანაფინანსებენ Atomic Monster და Blumhouse. პროდიუსერები არიან ჯეიმს ვანი, ჯეისონ ბლუმი და ჯონ ქევილი. მაიკლ ქლირი, ჯადსონ სკოტი და მაკდარა ქელეჰერი აღმასრულებელი პროდიუსერების როლს ასრულებენ. ალაინა გლასტალი პროექტს Atomic Monster-ის მხრიდან ზედამხედველობს. კრონინის Doppelgängers სტუდია ასევე მონაწილეობს წარმოებაში. დაინტერესებული ხართ ლი კრონინის „მუმიას“ ნახვით? იხილეთ კლიპი სტატიის ბოლოს.