კინოკომპანია Warner Bros.-მა სანდრა ბულოკისა და ნიკოლ კიდმანის მონაწილეობით ფილმ „პრაქტიკული მაგია 2“-ის გამოსვლის თარიღი გადმოწია. ფილმის ახალი პრემიერა 2026 წლის 11 სექტემბერს შედგება, რაც იმას ნიშნავს, რომ ფანტასტიკური ჟანრის სურათი ერთი კვირით ადრე გამოვა. თავდაპირველად „პრაქტიკული მაგია 2“-ის გამოსვლა 2026 წლის 18 სექტემბრისთვის იყო დაგეგმილი. სიუჟეტის დეტალებზე ჯერჯერობით ბევრი არაფერია ცნობილი, გარდა იმისა, რომ „პრაქტიკული მაგია 2“ დაფუძნებულია ელის ჰოფმანის წიგნების სერიის „პრაქტიკული მაგიის“ შემდგომ ნაწილზე. ფილმის სცენარი აკივა გოლდსმანს ეკუთვნის, რომელიც პირველი ნაწილის თანაავტორიც იყო, ხოლო რეჟისორის სავარძელში სიუზან ბიერი მოგვევლინება. ბულოკი და კიდმანი ასევე პროდიუსერების როლშიც გამოდიან დენიზ დი ნოვთან ერთად. ორ ვარსკვლავს შეუერთდებიან ჯოი კინგი, ლი პეისი, მეიზი უილიამსი, ქსოლო მარიდუენია და სოლი მაკლეოდი, ასევე დიანა უისტი და სტოკარდ ჩენინგი. ფილმი „პრაქტიკული მაგია“ თავდაპირველად 1998 წელს გამოვიდა და დაფუძნებული იყო ელის ჰოფმანის 1995 წლის ამავე სახელწოდების რომანზე. ფილმი მოგვითხრობდა ოუენსების დების ისტორიას, რომლებსაც მაგიის გამოყენება მოუხდათ, რათა გაენადგურებინათ ჯილიანის მოძალადე შეყვარებულის ბოროტი სული, რომელიც მათ დევნიდა. მიუხედავად იმისა, რომ ფილმმა კრიტიკოსების დიდი მოწონება თავიდანვე არ დაიმსახურა, წლების განმავლობაში მან უზარმაზარი საკულტო მიმდევრობა შეიძინა. „სალი (სანდრა ბულოკი) და ჯილიან ოუენსები (ნიკოლ კიდმანი), ჯადოსნურ ოჯახში დაბადებულები, ძირითადად თავს არიდებდნენ ჯადოქრობას“, — ნათქვამია ორიგინალური ფილმის აღწერაში. „მაგრამ როდესაც ჯილიანის სასტიკი შეყვარებული, ჯიმი ანგელოვი (გორან ვიშნიჩი), მოულოდნელად კვდება, ოუენსის დები იძულებულნი ხდებიან, დაეუფლონ რთულ მაგიას. როდესაც პოლიციელი გარი ჰალეტი (ეიდენ ქუინი) ეჭვს იწყებს, გოგონები ცდილობენ ანგელოვის გაცოცხლებას — და უნებლიეთ მის გვამს ბოროტ სულს უნერგავენ, რომელიც მათ საგვარეულოს გადაშენებით ემუქრება.“ ბულოკისა და კიდმანის გარდა, ფილმში ასევე მონაწილეობდნენ დიანა უისტი, სტოკარდ ჩენინგი და ეიდენ ქუინი. ფილმის რეჟისორი იყო გრიფინ დანი, სცენარი კი რობინ სვიკორდს, აკივა გოლდსმანსა და ადამ ბრუკსს ეკუთვნოდათ.