მოულოდნელი ინფორმაციით, Sony Pictures-ი ახალ „ვენომის“ ფილმზე მუშაობს, რომელიც სტუდიის მიერ აქამდე გამოშვებული სამი ნაწილისგან განსხვავებული იქნება. The Hollywood Reporter-ის (THR) ახალი ცნობით, „ვენომის“ ახალი ფილმი მზადდება, თუმცა ის ცოცხალი მოქმედების (live-action) ნაცვლად, ანიმაციური იქნება. THR-ის ინფორმაციით, Sony-მ პროექტის რეჟისორებად ზაკ ლიპოვსკი და ადამ ბ. სტაინი აირჩია, რომლებიც ცოტა ხნის წინ გამოშვებული ფილმის „Final Destination Bloodlines“ რეჟისორები არიან. რაც შეეხება ტომ ჰარდის მონაწილეობას, THR ასევე აღნიშნავს, რომ ვარსკვლავი, რომელიც ედი ბროკის/ვენომის როლს ასრულებდა Sony-ის პირველ სამ ფილმში, პროექტში „რაღაც ფორმით“ იქნება ჩართული. გაურკვეველია, ნიშნავს თუ არა ეს იმას, რომ ჰარდი მხოლოდ ფილმის პროდიუსერი იქნება, თუ ის პერსონაჟს ხმას გაახმოვანებს. ამ დროისთვის სცენარისტის ან სხვა მსახიობების შესახებ ინფორმაცია არ გამჟღავნებულა. ემი პასკალი, ავი არადი და მეტ ტოლმახი, სავარაუდოდ, ამ ფილმის პროდიუსერებიც იქნებიან, ისევე როგორც პირველი სამი ნაწილის შემთხვევაში. ვენომის პერსონაჟი მწერალ ბილ მიკელინის და მხატვარ ტოდ მაკფარლეინის მიერ შეიქმნა და ის პირველად 1988 წლის „საოცარი ადამიანი-ობობას“ #300-ე ნომერში გამოჩნდა. პერსონაჟი მისი გამოჩენის დღიდან ფანების ერთ-ერთი ფავორიტია და ხშირად ადამიანი-ობობას ერთ-ერთ ყველაზე საკულტო ბოროტმოქმედად ითვლება. 2018 წელს Sony-მ გამოუშვა პირველი „ვენომის“ ფილმი ჰარდის მონაწილეობით, რასაც მოჰყვა ორი გაგრძელება: 2021 წლის „ვენომი: იყოს ჟლეტა“ (Venom: Let There Be Carnage) და 2024 წლის „ვენომი: უკანასკნელი ცეკვა“ (Venom: The Last Dance). სამივე ფილმმა უზარმაზარი სალარო შემოსავალი მოიტანა, ჯამში $1.8 მილიარდი დოლარი. (წყარო: The Hollywood Reporter)