ესპანური კინოს საკულტო ფრენჩაიზის, „ტორენტეს“ მეექვსე ნაწილი მოგვითხრობს ამპარტავანი, ულტრა-მემარჯვენე „ნაძირალა“ ტორენტეს შესახებ, რომელიც პარტია „ნოქსის“ (Nox) სახელით ესპანეთის პრეზიდენტობისთვის იბრძვის, იმ დროს, როდესაც ესპანეთის ულტრა-მემარჯვენე პარტიას „ვოქსი“ (Vox) ჰქვია. ესპანეთის უდიდესი კომედიური ფრენჩაიზის მსოფლიო ასპარეზზე გაყვანის თამამი ნაბიჯით, Film Factory-მ მოიპოვა ფილმის „ტორენტე პრეზიდენტად“ საერთაშორისო გაყიდვების უფლებები. ფილმის რეჟისორი, სცენარისტი და მთავარი როლის შემსრულებელია სანტიაგო სეგურა, რომელიც განასახიერებს მუდმივად ნასვამ, ეგოცენტრულ, სექსისტ და რასისტ ყოფილ პოლიციელს, ტორენტეს. ფრენჩაიზი ესპანეთში 1998 წელს გამოჩნდა ფილმით „ტორენტე, კანონის სულელი მკლავი“, რომელსაც Variety-მ უწოდა „თავბრუდამხვევად არაპოლიტკორექტული“ და „უაღრესად სახალისო კომედია-თრილერი“. ამ სერიამ ესპანეთში 16 მილიონზე მეტი მაყურებელი მოიზიდა – შემოსავალი 100 მილიონ დოლარს გადააჭარბა – რითაც ესპანური კინოს ისტორიაში ყველაზე შემოსავლიან სერიად იქცა. როდესაც „ტორენტე“ პირველად გამოჩნდა, ის განიხილებოდა, როგორც დიქტატორ ფრანცისკო ფრანკოს დროის მხიარული პაროდია, წარსული, რომელსაც ესპანელთა უმეტესობა თანამედროვე დემოკრატიულ ესპანეთში უკვე ზურგს აქცევდა. თუმცა, დღეს უფრო აქტუალური და პირდაპირი მინიშნებები არსებობს. „ტორენტე პრეზიდენტად“ ესპანეთში Sony Pictures-ის მეშვეობით 2026 წლის 13 მარტს გამოვა, ესპანეთში საყოველთაო არჩევნების მოლოდინში, რომელიც 2027 წლის აგვისტომდე უნდა ჩატარდეს. ესპანეთისთვის ერთ-ერთი უმსხვილესი პოლიტიკური კითხვაა, შეძლებს თუ არა ულტრა-მემარჯვენე პარტია Vox-ი კოალიციური მთავრობების ნაწილი გახდეს ფედერალურ, რეგიონულ თუ მუნიციპალურ დონეზე. „ტორენტეს“ სიუჟეტი ჯერ კიდევ გასაიდუმლოებულია. ინტერნეტში გავრცელებული ერთ-ერთი სცენა გვიჩვენებს ტორენტეს, რომელიც აივნიდან მიმართავს თავისი პარტიის, „ნოქსის“ (Nox) ბანერის ქვეშ შეკრებილ მიმდევრებს. „ჩემი ბარგი მზად მაქვს ესპანეთი 14 მარტს დავტოვო“, - ხუმრობდა სეგურა ესპანურ კომედიურ თოქ-შოუ „ელ ორმიგეროში“ ამ დეკემბერში. Film Factory-მ პარასკევს განაცხადა, რომ ფილმში საერთაშორისო სამსახიობო შემადგენლობა მიიღებს მონაწილეობას, რაც აჩენს კითხვას, იქნება თუ არა მინიშნებები ტრამპზე, მასკზე ან სხვა ფიგურებზე, რომლებიც არც ისე შორს დგანან ტორენტეს პოლიტიკური კრედოდან. „პოლიტიკურად დატვირთული ნარატივით, მახვილი სატირითა და პროვოკაციული იუმორით, ფილმი ესპანელ ანტიგმირს გაბედულ, თანამედროვე სოციალურ ლანდშაფტში წარმოაჩენს, რაც ადგილობრივ და გლობალურ აუდიტორიასაც მოხიბლავს“, - აცხადებს Film Factory თავის ახალ პროექტზე. „ტორენტე ესპანური კინოს ერთ-ერთი ყველაზე ძლიერი და ცნობადი ბრენდია. ჩვენ ვამაყობთ, რომ ვთანამშრომლობთ სანტიაგო სეგურას ლეგენდარული და საკულტო საგის ამ ახალ ნაწილზე“, - განაცხადა Film Factory-ის აღმასრულებელმა დირექტორმა ვისენტე კანალესმა. „ეს საგის ყველაზე ამბიციური ფილმი იქნება“, - დაჰპირდა სეგურა. „ტორენტე ყოველთვის ბრუნდება... და ყოველთვის იმარჯვებს.“ მართლაც, თუ ტრამპმა ან ბოლსონარომ გაიმარჯვეს, რატომ არ უნდა გაიმარჯვოს ტორენტემ?